ما اعرفش اقولِكْ وارسمك ..
أنا أصلي عايش من زمان
تلميذ بليد بتعلِّمك ..
إنتي الصراحة المغريه ..
وانتي الحقيقة المؤلمه ..
يا طلة النور م السما ..
ما اعرفش اقولك إنما ..
بيقولوا عنك في المدارس ..
ملهمه ..
....
يا لخبطة آخر النهار ويا المسا ..
يا طعم شخبطة العيال في المدرسه ..
بتعلميني ان الخطايا
مش في مفهوم البشر ..
يا لون تفاصيل السهر ..
ساذج قوي شكل الكلام ..
إزاي هاقول عنك عنك قمر ..
آخره يادوب ليلة تمام ؟!
....
قالوا زمان ..
الصمت حكمه ..
علمي قلبك بقي علشان ما بعرفش اقنعه ..
ماهو برضه يعني الليل بيسكت
واحنا دايماً نسمعه ..
....
بسمع في صمتك
زقزقة عصافير كتير بيسبّحوا ..
يا ريحة الماضي البعيد ..
أول ما قلبي بيفتحُه ..
قدام عيونك ليه بكون
تلميذ بليد دايماً عيونه بتفضحه ..
عايزاني أقول انك ربيع
مفرود على وشوش البشر
والشمس تطلع كل يوم تستقبلك ؟!
تطبع على عيونك .. قبول ..
يا بصة النور م الضلام
ما اعرفش اقول ..
يمكن عشان الدنيا دايماً تبقى برد ..
وبيبقى نفسي افرد مساحة تخش منها الشمس ليا .. ومش لحد ..
يمكن عشان طعم الكلام مش حلو
لما يكون بجد ..
....
يا كل ألوان الحاجات المدهشة
انتي الربيع .. وانتي الخريف ..
أنا مين عشان اوصف قدر
أنا تهتهة عيل بيتلخبط كتير
علشان يكوِّن في الحروف ..
وازاي اقولك كلمتين
يا شهوة الحب العفيف ..
....
ما يغرّكيش حبة كلام
أوقات كتيرة بنشطبه
الشعر ضي من الوجع
بنجمله .. ونرتبه
وعشان كده
خليني اشوفك بره مضمون القصيدة عشان بجدْ ..
كل الأحبه بيكدبوا
badmood
------------------------------------------
|